सुपरफ्लप सिनेमाको पनि सिक्वेल

ग्ल्यामर नेपाल, काठमाडौं । संसारभरका सिनेमा उद्योगमा सिक्वेल फिल्मको ट्रेन्ड सामान्य भइसकेको छ। सिक्वेल यस्तो फिल्मको बनाइन्छ, जुन बक्स अफिसमा हिट भएको हुन्छ। फ्लप फिल्मको सिक्वेल निर्माण गर्ने आँट विदेशी निर्मातामा देखिएको थिएन। तर एक नेपालीले सुपरफ्लप फिल्मको सिक्वेल बनाउने घोषणा गरेका छन्। उनी हुन्, ‘मुखौटा’ फिल्मका निर्माता रविन श्रेष्ठ।

मुखौटामा नायिका निशा अधिकारीको हट अवतार – भिडियो हेर्नुहोस

जेठ ३० गतेबाट रिलिज भएको यो फिल्मले निकै लज्जास्पद व्यापार गर्‍यो। आधा दर्जन स्टार कलाकारको अभिनय भएपनि रिलिजको पहिलो दिनबाटै हलमा दर्शकको सुख्खा लाग्यो। सामाजिक सञ्जालमा फिल्मको कन्टेन्ट र प्रस्तुतीको व्यापाक विरोध भयो। कतिसम्म भने निर्देशक, लेखक तथा अभिनेता अर्पण थापाले केही दिन फेसबुक एकाउन्ट डिएक्टिभ गर्नुपर्‍यो तर यति हुँदाहुँदै पनि रविनले ‘मुखौटा २’ निर्माण गर्ने बताएर धेरैलाई चकित तुल्याएका छन्। उनले फेसबुकमार्फत ‘मुखौटा २’ लिएर आउने जानकारी दिएका हुन्।

‘मुखौटा’को अन्त्यमा समाप्त नलेखिएको जानकारी गराउँदै रविनले छिट्टै ‘मुखौटा २’ लिएर आउने जनाएका छन्। उनका अनुसार कलाकार भने फाइनल भइसकेको छैन्। सोही कारण कलाकार र अन्य क्रयु परिवर्तन हुन सक्ने अनुमान गरिएको छ। सामान्यतया सिक्वले फिल्ममा निर्देशक र कलाकारहरु दोहोर्‍याइन्छ।

सहरका ग्याङस्टारको कथा भन्ने ‘मुखौटा’मा राजेश हमाल, सौगात मल्ल, सुनिल थापा, दयाहाङ राई, प्रशान्त ताम्राकार, निशा अधिकारी, हर्षिका श्रेष्ठलगाएतका कलाकारको अभिनय रहेको छ।