शम्भुजित बास्कोटाको यो कस्तो ‘ह्याङ्’ ?

 एक जमानामा फिल्म होस् या एल्बम, जताततै शम्भुजित बाँस्कोटाको संगीत अनिवार्य हुन्थ्यो। कतिपय फिल्मकर्मी तथा गायक/गायिका उनको संगीतका लागि महिनौँ कुर्थे। तर, ती सबै कुरा अहिले एकादेशको कथाजस्तै भएको छ। सुरेश अधिकारी, महेश खड्का, वसन्त सापकोटाजस्ता संगीतकारको उदयसँगै शम्भुजित छायाँमा परे। हिजो उनको संगीतका लागि महिनौँ कुर्ने फिल्मकर्मी नै अहिले उनलाई ‘बाल’ दिँदैनन्। एकाध फिल्ममा संगीत दिने मौका पाए पनि शम्भुजित हिट हुन सकेका छैनन्। तीतो भए पनि यथार्थ यही हो तर पनि शम्भुजितलाई पहिलेको ‘ह्याङ्’ छुटेको रहेनछ भन्ने हालै प्रमाणित भएको छ। एक एल्बम विमोचन कार्यक्रममा उनले ‘शिशिर योगीलाई फत्तेमान बनाउँछु’ भनेर गफ लगाएपछि उनी आफैँ कार्टुन भए। एक संगीतकर्मी व्यंग्य गर्दै थिए, ‘आफ्नै विरासत जोगाउन नसकेका बेला अरूलाई यस्तो र उस्तो बनाउँछु भन्न पनि कसरी सकेका होलान् ?’ – नेपाल साप्ताहिक