ब्लकबस्टर फिल्म ‘जेरी अन टप’ का निर्माता सरोज न्यौपानेले नयाँ फिल्म ‘फेरि भेटौंला’ निर्माण गर्ने संकेत दिएका छन्। सामाजिक संजालमा AI-सिर्जित पोस्टर सार्वजनिक गर्दै उनले ‘जेरी अन टपलाई तपाईँहरूले दिनुभएको अथाह मायापछि फेरि भेटौँला नयाँ वर्षमा’ लेखेका छन्।
पोस्टरमा एक युवक र दुई युवतीलाई मुख्य रूपमा प्रस्तुत गरिएको छ। पोस्टरको यही संरचनाले ‘फेरि भेटौंला’ त्रिकोणात्मक प्रेमकथाको वरिपरि अघि बढ्न सक्ने संकेत दिएको छ। यद्यपि फिल्मको कथावस्तु, कलाकार तथा अन्य प्राविधिक पक्षबारे विस्तृत जानकारी भने केहिपनि सार्वजनिक गरिएको छैन।
पोस्टरमा प्रेम, मित्रता, सम्बन्ध र पुनर्मिलनको भाव झल्किने दृश्यात्मक संकेतहरू पनि देखिन्छन्। फिल्मको शीर्षक ‘फेरि भेटौंला’ र पोस्टरको समग्र भावले सम्बन्ध, विछोड र पुनः भेटको कथालाई केन्द्रमा राख्न सक्ने अनुमान गर्न सकिन्छ।
सरोज न्यौपाने निर्माता रहेको फिल्मबारे थप विवरण निर्माण पक्षले आगामी दिनमा सार्वजनिक गर्ने अपेक्षा गरिएको छ।
