ग्ल्यामर नेपाल, काठमाडौं । आठ वर्षे बालक सौगात विष्टले निर्देशन गरेको फिल्म ‘लभ यू बाबा’ को शीर्ष गीत सार्वजनिक भएको छ । ‘मेरो मुटुको टुक्रा तिमी’ बोलको गीतमा अभिनेता गजित विष्ट र बाल कलाकार संगम विष्टले फिचरिङ गरेका छन्। साइनोले सौगात र संगम गजितका सन्तान हुन् ।
मौलिक नेपाली सामाजिक विषयबस्तुमा बाबु–छोरीबिचको आत्मीय सम्बन्ध र घटना एवं परिदृश्यलाई समेटिएर निर्माण गरिएको फिल्म आगामी मंसीर २६ गतेबाट अल नेपाल रिलिज हुँदैछ । शीर्ष गीतमा कृष्ण काफ्ले र आयुष्मा नकर्मीले स्वर दिएका छन् भने गीतमा शान्तिप्रियको शब्द र डेनी निरौलाको संगीत छ ।
डान्स फिभरको व्यानरमा निर्मित फिल्ममा निश्मा घिमिरे, अशिस्मा नकर्मी, अनु शाह, निर्मल शर्मा, बसन्त भट्ट, अनमोल अग्रवाल, अर्जुन गुरुङ, प्रकाश बस्नेत, राजु बजाज, सुरेन बसेललगायतको अभिनय रहेको छ । गजितकै कथा रहेको फिल्ममा पटकथा तथा कोरियोग्राफी गम्भिर विष्टको छ ।
दीपक शर्मा, स्वरुपराज आचार्य, डेनी निरौला र प्रदिप बास्तोलाको संगीत, चन्द्र पन्तको द्वन्द्व रहेको फिल्ममा कृष्णहरि बराल, शान्तिप्रिय, चन्द्रमणी भट्टराई, प्रदीप बास्तोलाको गीत छ । फिल्ममा पत्रकार सुब्रत आचार्य र नायिका अनु अतिथि भूमिकामा छन् । फिल्मका निर्मातामा सम्झना पोखरेल र सहनिर्मातामा रोशनी बज्राचार्य छन् ।
