नेपाली तारामा पुगिन् रेखा

ग्ल्यामर नेपाल, काठमाडौं ।
आगामी पौष २५ गतेबाट प्रदर्शनमा आउन लागेको फिल्म ‘तथास्तु’को प्रमोसन गर्न अभिनेत्री रेखा थापा हालै गायन रियालिटी शो ‘नेपाली तारा’मा पुगेकी छन् । यसै साता तीन वटा च्यानलबाट प्रशारण हुने शोमा रेखा अतिथिको भूमिकामा प्रस्तुत भएकी हुन् ।

कार्यक्रममा रेखाले फिल्मको बारेमा बोलिरहँदा प्रतियोगिताका एक प्रतिष्पर्धीले फिल्मकै गीत ‘कहिले माया स्याड फेस कहिले माया ब्याड फेस’ गीत गाएका थिए । रेखाले नेपाली तारामा तेश्रो स्थान हासिल गर्ने प्रतियोगीलाई आफ्नो फिल्म ‘रामप्यारी’ मा गायनको अवसर दिने घोषणा गरिन् । ‘पहिलो र दोस्रोलाई त जहाँ त्यही अवसर मिल्छ । प्रतियोगीतामा तेश्रो हुनेलाई अवसर पाउन गाह्रो हुन्छ । त्यसैले नेपाली तारामा तेश्रो हुनेलाई रेखा फिल्मस्ले गायनको अवसर दिनेछ ।’ उनले भनिन् । यो कार्यक्रम नेपाल टेलिभिजनमा यही शनिबार साँझ ८:५० बजे प्रशारण हुनेछ भने इमेज टेलिभिजनमा सोमबार साँझ ८ बजे र नेपाल वानमा बुधबार साँझ ९ बजे प्रशारण हुनेछ ।

सविर श्रेष्ठले निर्देशन गरेको फिल्ममा रेखाको एक्सन अवतारलाई देख्न सकिन्छ । फिल्ममा रेखासँगै किशोर खतिवडा, सुवास थापा र विज्ञान जोशीको पनि अभिनय छ । बाबु श्रेष्ठको छायांकन र रोशन श्रेष्ठको द्धन्द्ध निर्देशन रहेको फिल्ममा बसन्त सापकोटाको संगीत छ ।