सुदर्शन गौतम को मुख्य भूमिका रहने चलचित्र “हिम्मतवाला” को क्यानाडामा शुभमुहुर्त गरिएको छ। शुभ मुहर्त कार्यक्रममा चलचित्रको फर्स्टलुक पोस्टर समेत सार्बजनिक गरिएको थियो। चलचित्रको सार्वजनिक पहिलो पोष्टरमा सुदर्शन एक्लै देखिएका छन्। चलचित्रको पोष्टरलाई एक कार्यक्रमका लागी क्यानाडा पुगेका माइती नेपालकी अध्यक्ष तथा सिएनएन हिरो अनुराधा कोईराला, हाँस्य कलाकार दीपकराज गिरी र दिपाश्री निरौलाले सयूंक्त रुपमा सार्वजनिक गरेका हुन्। चलचित्रको छायाँकन क्यानडा र अमेरिकामा हुने तयारी भइरहेको छ।
कार्यक्रममा टंक बुढाथोकीको स्वर र संगीतमा रहेको चलचित्रको “म हुँ हिम्मतवाला” गीतको अडियो समेत सार्बजनिक गरिएको थियो। सार्वजनिक गीतमा कलाकारहरुले नृत्य प्रस्तुत गरेका थिए।
पुराना निर्देशक हरि सिवाकोटीले निर्देशन गर्न लागेको यस चलचित्रमा नायक सुदर्शन गौतम एक्सन अवतारमा प्रस्तुत हुँदैछन्। यसअघि चलचित्रलाई इश्वर थापाले निर्देशन गर्ने बताईएको थियो। हरि सिवाकोटीले “सौता”, “बेदना र मुक्ति”, अमेरिकामा निर्मित पहिलो नेपाली चलचित्र “इस्ठ मित्र, क्यानडामा निर्मित चलचित्र “मैले विरोध गरेको छैन” लगायतका चलचित्रहरु निर्देशन गरिसकेका छन्।
चलचित्र ‘हिम्मतवाली’मा अभिनय गरेर चर्चा बटुलेका सुदर्शनले यस चलचित्रमा आफु विल्कुलै फरक भुमिकामा देखिन लागेको बताए। अगष्टबाट छायाँकन सुरु हुने बताईएको छ।
