गोल्डेन हिल्स पिक्चर्स प्रा.लि.को प्रस्तुति नेपाली चलचित्र ‘लप्पन छप्पन’ को निर्माण युनिट युरोपका विभिन्न स्थानमा छायाँकन सकेर नेपाल फर्किएको छ। स्वीजरल्याण्ड, हल्याण्ड, बेल्जियम र लक्जमवर्गका मुख्य रमणीय स्थानमा छायांकन गरेको चलचित्रको बाँकि दृश्यहरु नेपालमा नै छायांकन हुँदैछ।
लप्पन छप्पनमा हलिउडका कलाकार ओलिभर ब्लुर्कले समेत अभिनय गरेका छन्। ओलिभरसँगै लप्पन छप्पनमा नेपाली चर्चित कलाकारहरुको बाहुल्यता छ। चलचित्रमा सौगात मल्ल, दयाहाङ राई, अर्पण थापा, वर्षा शिवाकोटी, श्याम श्रेष्ठ, देवु श्रेष्ठ, शिव खरेल, प्रकाशजंग शाह, सुन्दर श्रेष्ठ, शान्ति भट्ट लगायतका कलाकारहरुको अभिनय छ। हलिउडका कलाकार सहित नेपालका चर्चित कलाकारहरुको अभिनयका कारण पनि चलचित्र हेर्नलायक बनेको निर्देशक मुकुन्द भट्टको दाबी छ। यसो त युरोपमा ५० प्रतिशत भाग छायाँकन गरिएको चलचित्र लप्पन छप्पनको ५० प्रतिशत छायाँकन नेपालमै पनि बाँकी छ।
चलचित्रमा मुकुन्द भट्टको निर्देशन तथा लेखन छ। चलचित्रको छायाँकार पुरुषोत्तम प्रधान हुन् द्वन्द्व निर्देशन चन्द्र पन्तले गरेका छन्। चलचित्रका सम्पादक सुरेन्द्र पौडेल हुन् भने संगीत दिपक आरजेको रहेको छ। चलचित्रका निर्माता डम्बर बहादुर चन्द, सहनिर्माता इन्द्रप्रसाद खरेल, कार्यकारी निर्माता सहदेव गौतम एवं प्रस्तुतकर्ता जानुका कंडेल रहेकी छिन्।
