सन्तानको खुसी र भविष्यका लागि एउटा बुवाले कति हदसम्म त्याग गर्न सक्छ? यही भावनात्मक प्रश्नलाई केन्द्रमा राख्दै हरि लम्साल निर्देशित चलचित्र ‘बाः एक योद्धा’को ट्रेलर सार्वजनिक गरिएको छ।
निर्माण पक्षले काठमाडौंमा आयोजित कार्यक्रममा सार्वजनिक गरेको ट्रेलर बुवा, सन्तान, परिवार र त्यागको कथामा केन्द्रित छ। आफ्ना छोराछोरीको सुखका लागि जीवनभर संघर्ष गर्ने बुवाले अन्ततः आफ्नै सन्तानबाट पाउने चोटले कथा भावनात्मक मोडमा पुग्ने संकेत ट्रेलरले गरेको छ।
ट्रेलरमा सन्तानको खुसीका लागि आफू बसिरहेको घरसमेत बेच्न तयार एक बुवाको अवस्था देखाइएको छ। परिवारका लागि निरन्तर त्याग गरिरहँदा त्यही परिवारबाट मिल्ने पीडा र उपेक्षाले उनको जीवन कसरी बदलिन्छ भन्ने कथा फिल्मको प्रमुख द्वन्द्व बन्ने देखिन्छ।
बाबुआमाले सन्तानका लागि गर्ने त्यागलाई बिर्सिने प्रवृत्ति बढ्दै गएको सामाजिक यथार्थलाई पनि ट्रेलरले छोएको छ। आफूलाई जन्माउने, हुर्काउने र योग्य बनाउने अभिभावकलाई बेवास्ता गर्दा परिवारभित्र उत्पन्न हुने दूरी र त्यसको परिणाम कथाको महत्वपूर्ण हिस्सा बनेको संकेत मिल्छ।
ट्रेलर अगाडि बढ्दै जाँदा परिवारको खुसी हराउँछ र सम्बन्धहरू टुक्रिन थाल्छन्। त्यसपछि मुख्य पात्रले के निर्णय गर्छ भन्ने विषयलाई भने निर्माण पक्षले रहस्यकै रूपमा राखेको छ।
सबै गुमाइसकेको अनुभूति भएपछि एउटा बुवाले कस्तो कदम चाल्छ? यही प्रश्न दर्शकको मनमा छाड्दै ट्रेलर सकिन्छ। भावनात्मक पारिवारिक कथासँगै अन्तिमतिर थपिएको सस्पेन्सले फिल्मको क्लाइमेक्सप्रति कौतुहलता बढाएको छ।
निर्माण पक्षका अनुसार नेपाली परिवारमा सन्तानको भविष्यका लागि बुवाले गर्ने त्याग, संघर्ष र जीवनभर सामना गर्ने चुनौती चलचित्र ‘बाः एक योद्धा’को मूल विषय हो।
🎬 ‘बाः एक योद्धा’को ट्रेलर हेर्नुहोस्
चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापा मुख्य भूमिकामा छन्।
संगीतकार, रचनाकार तथा गायकका रूपमा परिचित हरि लम्सालको फिचर फिल्म निर्देशनमा यो पहिलो प्रयास हो। उनले चलचित्रको कथा र पटकथा पनि आफैँ लेखेका छन्।
आर्टिस्टिक इन्टरटेनमेन्टको ब्यानरमा निर्माण भएको चलचित्रका निर्माता वसन्त लम्साल हुन्। अनिल बुढाथोकी कार्यकारी निर्माता, कृष्ण काफ्ले सह–निर्माता र अर्जुन पौडेल लाइन प्रोड्युसर छन्।
चलचित्रको छायांकन शिवराम श्रेष्ठले गरेका छन् भने मुख्य सहायक निर्देशकमा तारानाथ न्यौपाने छन्।
कुशे औंसी अर्थात् बुबाको मुख हेर्ने दिनको पूर्वसन्ध्यामा भदौ १९ गते प्रदर्शनमा आउने ‘बाः एक योद्धा’लाई आशिष एच तामाङ र प्रदीप धामीको कुवेर सिने डिस्ट्रिब्युसनले वितरण गर्नेछ।
परिवार, अभिभावकप्रतिको जिम्मेवारी र सन्तानका लागि बुवाले गर्ने त्यागलाई भावनात्मक ढंगले प्रस्तुत गरेको ट्रेलरले अब फिल्मको अन्तिम निर्णय र त्यसको परिणाम कस्तो हुनेछ भन्ने उत्सुकता थपेको छ।
